តបតាមការអញ្ជើញរបស់គណ:កម្មការវត្តបារមីគិរីខេមរាភ្នំបិតាធំ នៅថ្ងៃទី២៩ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន អមដោយមន្ត្រីស្ថានទូត បានអញ្ជើញចូលរួមកម្មវិធីរំកិលរូបព្រះពុទ្ធប្បដិមាទៅតម្កល់ក្នុងព្រះវិហារថ្មីរបស់វត្តបារមីគិរីខេមរាភ្នំបិតាធំ ដែលទើបត្រូវបានកសាងរួច ស្ថិតនៅខេត្តកាណាហ្គាវ៉ា ប្រទេសជប៉ុន។ កម្មវិធីនេះ ត្រូវបានរៀបចំធ្វើឡើងស្របតាមពិធីព្រះពុទ្ធសាសនា ដោយមានការនិមន្តចូលរួមពីព្រះសង្ឃខ្មែរ ចំនួន ៤អង្គ ក្នុងនោះនិមន្គពីវត្តខ្មែរសាមគ្គីចំនួន ២អង្គ ព្រមទាំងមានការចូលរួមពីពុទ្ធបរិស័ទចំណុះជើងវត្ត ក៏ដូចជាបងប្អូនខ្មែរជិតឆ្ងាយចូលរួមយ៉ាងច្រើនកុះករ ផងដែរ៕

នៅព្រឹកថ្ងៃទី២៥ ខែមីនា ឆ្នាំ២០២៥ តបតាមការស្នើសុំរបស់លោក Takeshi Shinoda ប្រធានសមាគម Kashiwa UNESCO Association  ឯកឧត្តមឯកអគ្គរាជទូតកម្ពុជាប្រចាំប្រទេសជប៉ុន បានអនុញ្ញាតឱ្យលោកគ្រូអ្នកគ្រូ អាណាព្យាបាល និងសិស្សានុសិស្សសរុបចំនួន ៣២ រូប មកធ្វើទស្សនកិច្ចសិក្សា និងស្វែងយល់អំពីទំនាក់ទំនងកម្ពុជា-ជប៉ុន ព្រមទាំងស្តាប់បទបង្ហាញស្តីអំពីកម្ពុជា នៅស្ថានទូតកម្ពុជាប្រចាំប្រទេសជប៉ុន។ 

នៅក្នុងសុន្ទរកថាស្វាគមន៍ ឯកឧត្តមឯកអគ្គរាជទូត បានគូសបញ្ជាក់អំពីប្រវត្តិទំនាក់ទំនងការទូតរវាងកម្ពុជានិងជប៉ុន ដែលមានរយៈពេលជាង ៧សតវត្ស មកហើយ គឺចាប់តាំងពីខែមករា ឆ្នាំ១៩៥៣មក និងដែលថ្មីៗនេះ កម្ពុជា-ជប៉ុនបានក្លាយជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ២០២៣។ ឯកឧត្តមឯកអគ្គរាជទូត ក៏បានលើកឡើងផងដែរអំពីកំណើនភ្ញៀវទេសចរណ៍ជប៉ុនដែលបានទៅលេងប្រទេសកម្ពុជាគឺមានចំនួន ១១២,៧១៨ នាក់នៅឆ្នាំ២០២៤ (កើនឡើងជាង៣០% បើធៀបនឹងឆ្នាំ២០២៣)។ ជាចុងក្រោយ ឯកឧត្តមឯកអគ្គរាជទូត ក៏បានកោតសរសើរដល់លោកគ្រូ អ្នកគ្រូ អាណាព្យាបាល និងសិស្សានុសិស្សទាំងអស់ដែលមានចំណាប់អារម្មណ៍ចង់សិក្សាស្វែងយល់អំពីប្រទេសកម្ពុជា ទំនាក់ទំនងកម្ពុជា-ជប៉ុន និងការងាររបស់ស្ថានទូតកម្ពុជាប្រចាំប្រទេសជប៉ុន និងបានអំពាវនាវឱ្យពួកគេជួយបន្តផ្សព្វផ្សាយនូវអ្វីដែលបានដឹងនៅថ្ងៃនេះជូនដល់ប្រជាជនជប៉ុនផ្សេងៗទៀត និងប្រសិនមានឱកាសសូមទៅអញ្ជើញទៅទស្សនាប្រទេសកម្ពុជាដោយផ្ទាល់។

កម្មវិធីខាងលើ គឺជាផ្នែកមួយនៃការចូលរួមផ្សព្វផ្សាយអំពីវប្បធម៌ ប្រពៃណី និងតំបន់ទេសចរណ៍របស់កម្ពុជា ដែលទាំងនេះនឹងជួយជម្រុញដល់វិស័យទេសចរណ៍នៅកម្ពុជានាពេលអនាគត៕

នៅថ្ងៃទី២៣ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុនបានអញ្ជើញជាអធិបតីក្នុងកម្មវិធីប្រលងចម្រៀង សំនៀងកូនខ្មែរនៅក្នុងប្រទេសជប៉ុន ឆ្នាំ២០២៥ វគ្គផ្តាច់ព្រ័ត្រ ដែលសហការរៀបចំដោយសមាគមរួបរួមពលរដ្ឋកម្ពុជា-ជប៉ុន ផ្ទះតារា ក្រុមការងារ ESEA សមាគមកម្ពុជា-ជប៉ុន គិបូ។ ក្នុងកម្មវិធីនេះ ក៏មានការ​អញ្ជេីញចូលរួមពីសំណាក់​លោក គួច ខេវិន អគ្គនាយប្រតិបត្តិ និងជាអ្នកដឹកនាំជាន់ខ្ពស់គ្រប់គ្រងផលិតកម្មវិធីកំសាន្ត សម្រាប់ស្ថានីយទូរទស្សន៍នៅកម្ពុជា និង លោក ផាត់ តារារដ្ឋ ចាងហ្វាងសារព័ត៌មានផ្ទះតារា និង ជាប្រធានសិល្បករគ្រួសារតារា ដែលអញ្ជើញមកពីប្រទេសកម្ពុជា។

ក្នុងឱកាសបើកកម្មវិធី ឯកឧត្តម ឯកអគ្គរាជទូត បានរំលឹកអំពី ៖ ១) សោកនាដកម្មខ្លោចផ្សារ ក្នុងរបបប្រល័យពូជសាសន៍ខ្មែរក្រហម ដែលបានសម្លាប់ប្រជាជនជាងមួយលាននាក់ ក្នុងនោះរួមទាំងអ្នកចម្រៀងល្បីៗផងដែរ ២)ក្រោយថ្ងៃ ៧ មករា ឆ្នាំ ១៩៧៩ ជាថ្ងៃរំដោះប្រជាជនកម្ពុជាចេញពីរបបខ្មែរក្រហម វិស័យវប្បធម៌ត្រូវបានស្តារ និងលើកស្ទួយឡើងវិញ រហូតដល់បច្ចុប្បន្ន ក្រោមការដឹកនាំរបស់រាជរដ្ឋាភិបាលកម្ពុជា ៣)តម្លៃសន្តិភាពដែលជាកត្តាចាំបាច់បំផុតក្នុងការកសាង អភិវឌ្ឍប្រទេសឲ្យបានរុងរឿង និង ៤)ចក្ខុវិស័យរបស់រាជរដ្ឋាភិបាលកម្ពុជា ក្នុងការប្រែក្លាយកម្ពុជា មានប្រាក់ចំណូលខ្ពស់នៅឆ្នាំ ២០៥០។

នៅវគ្គផ្ដាច់ព្រ័ត្រនេះ បេក្ខជនតម្រូវអោយបង្ហាញសមត្ថភាពចំនួន២វិញ្ញាសារ គឺវិញ្ញាសារបទយុវវ័យ និង បទក្នុងជំនាន់ដើម ហើយរំលេចសំលៀកបំពាក់ខោចែវ មួកស្លឹកត្នោត អាវអាចារ្យ បែបខ្មែរ។​ ជាលទ្ធផល​ចំណាត់ថ្នាក់លេខ១ បានទៅលើបេក្ខជនឈ្មោះ ផែន កងម៉េង ដោយទទួលបានពានរង្វាន់មួយ និងមេដាយមាសចំនួន១គ្រឿង,​ ចំណាត់ថ្នាក់លេខ២ បានទៅលើបេក្ខជនឈ្មោះ អ៊ំ ម៉េងទ្រី​ ទទួលបានមេដាយប្រាក់មួយគ្រឿង និងចំណាត់ថ្នាក់លេខ៣ បានទៅលើបេក្ខជន ផេង ម៉េងហួរ ទទួលបានមេដាយសំរិទ្ធិមួយគ្រឿង៕

នៅរសៀលថ្ងៃទី១៩ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្មអមស្ថានទូតកម្ពុជាប្រចាំប្រទេសជប៉ុន បានទទួលជួបពិភាក្សាការងារជាមួយ ឯកឧត្តម ស៊ឺហ្គិម៉ូតុ (Kazumi SUGIMOTO) សមាជិកសភា និងជាអគ្គនាយកការិយាល័យអន្តរជាតិ នៃគណបក្សនវានុវត្តន៍ជប៉ុន (Japan Innovation Party) ដែលអមដោយឯកឧត្តម Koichiro Ichimura សមាជិកសភា (Diet Member) និងជាអតីតអនុរដ្ឋមន្រ្តីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ ដោយផ្តោតសំខាន់លើការពង្រឹងទំនាក់ទំនងទ្វេភាគីរវាងកម្ពុជា-ជប៉ុន និងពង្រីកសកម្មភាពជំរុញពាណិជ្ជកម្ម និងវិនិយោគ រវាងប្រទេសទាំងពីរបន្ថែមទៀត តាមរយៈការចូលរួមពិព័រណ៍ពិភពលោក ២០២៥ អូសាកា កាន់សៃ។

ក្នុងជំនួបនេះ ប្រតិភូសមាជិកសភា បានស្វែងយល់កាន់តែច្បាស់អំពីសក្តានុពល និងកាលានុវត្តភាពវិនិយោគនៅកម្ពុជា​ ក៏ដូចជាវឌ្ឍនភាពការងារ នៃការរៀបចំពន្លាជាតិកម្ពុជា និងការចូលរួមរបស់កម្ពុជា នៅក្នុងពិព័រណ៍ពិភពលោក ២០២៥ អូសាកា កាន់សៃ។ ក្នុងន័យនេះ ប្រតិភូសមាជិកសភាជប៉ុន នឹងជួយជំរុញវិស័យឯកជនជប៉ុន និងអ្នកវិនិយោគជប៉ុន ឱ្យទៅធ្វើទស្សកិច្ចសិក្សានៅកម្ពុជា ដើម្បីសិក្សាស្វែងយល់បន្ថែម និងពិនិត្យលទ្ធភាពដាក់ទុនវិនិយោគនៅប្រទេសកម្ពុជា លើវិស័យកសិ-ឧស្សាហកម្ម ឧស្សាហកម្មកែច្នៃម្ហូបអាហារ រោងចក្រគ្រឿងបន្លាស់អេឡិកត្រូូនិច វិស័យថាមពល វិស័យសាធារណការ និងដឹកជញ្ជូន ព្រមទាំងសេវាកម្មពាក់ព័ន្ធនឹងវិស័យទេសចរណ៍ផងដែរ។  ជាមួយគ្នានោះ ប្រតីភូសមាជិកសភាសជប៉ុន បានស្នើ ឯកឧត្តមឯកអគ្គរាជទូត ចូលរួមផ្សព្វផ្សាយអំពីព្រឹត្តិការណ៍ពិព័រណ៍ពិភពលោក ២០២៥ អូសាកា កាន់សៃ និងចូលរួមរៀបចំជាសារវីដេអូខ្លី ដើម្បីជំរុញប្រជាជនជប៉ុន ប្រជាជនខ្មែរ និងភ្ញៀវអន្តរជាតិ ឱ្យចូលរួមគាំទ្រ និងទស្សនាពិព័រណ៍ពិភពលោកនេះ កាន់តែច្រើនកុះករ។

ជាកិច្ចឆ្លើយតប ឯកឧត្តមឯកអគ្គរាជទូត បានថ្លែងអំណរគុណជាខ្លាំងដល់ប្រតិភូសមាជិកសភាជប៉ុន ដែលរួមចំណែកជួយជំរុញវិស័យឯកជនជប៉ុន ឱ្យពិនិត្យលទ្ធភាពក្នុងការធ្វើធុរកិច្ច និងវិនិយោគនៅកម្ពុជា។ ឯកឧត្តមឯកអគ្គរាជទូត បានសម្ដែងនូវក្តីរីករាយក្នុងការជួយសម្របសម្រួល និងផ្តល់ប្រឹក្សាធុរកិច្ចដល់អ្នកវិនិយោគជប៉ុន ដើម្បីបង្កលក្ខណៈងាយស្រួល ដល់ដំណើរការបើកអាជីវកម្មនៅប្រទេសកម្ពុជា។ លើសពីនេះទៀត ឯកឧត្តមឯកអគ្គរាជទូត បានសម្ដែងការគាំទ្រចំពោះសំណើរបស់ឯកឧត្តម សឹហ្គីម៉ូតុស្តីពីការរៀបចំឱ្យមានជាសារវីដេអូខ្លី នាសប្តាហ៍ក្រោយ ដើម្បីចូលរួមផ្សព្វផ្សាយ និងជំរុញឱ្យភ្ញៀវចូលរួមទស្សនា កាន់តែផុលផុស នៅក្នុងព្រឹត្តិការណ៍ពិព័រណ៍ពិភពលោក ២០២៥ អូសាកា កាន់សៃ ខាងមុខនេះ។

នាព្រឹកថ្ងៃទី១៨ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម បានជួបពិភាក្សាការងារជាមួយគណៈប្រតិភូក្រសួងពាណិជ្ជកម្ម ដឹកនាំដោយ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម ដោយផ្តោតសំខាន់លើវឌ្ឍនភាពនៃការងាររៀបចំ និងការចូលរួមរបស់កម្ពុជា ក្នុងពិព័រណ៍ពិភពលោក ២០២៥ អូសាកា កាន់សៃ ដែលនឹងប្រព្រឹត្តទៅរយៈពេល ៦ខែ ចាប់ពីថ្ងៃទី១៣ ខែមេសា ដល់ថ្ងៃទី១៣ ខែតុលា ឆ្នាំ ២០២៥។ 

តាមរយៈជំនួបនេះ ភាគីទាំងពីរ នឹងបន្តសហការគ្នា ក្នុងការសម្របសម្រួលជាមួយភាគីជប៉ុនពាក់ព័ន្ធ ព្រមទាំងសហគមន៍ខ្មែរ ពលករ-កម្មសិក្សាការីខ្មែរ និងសិស្សនិស្សិតខ្មែរ ដើម្បីធានាឱ្យដំណើរការរៀបចំពន្លាជាតិកម្ពុជា ប្រព្រឹត្តិទៅបានដោយរលូន និងទាន់ពេលវេលាកំណត់ ជាពិសេសទទួលបានជោគជ័យក្នុងការរៀបចំពិធីការ និងការងារភស្តុភារ ជូនថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា ដែលនឹងអញ្ជើញដឹកនាំគណៈប្រតិភូកម្ពុជា មកចូលរួមក្នុង "ពិធីបើកពិព័រណ៍ពិភពលោក ២០២៥ អូសាកា" នៅថ្ងៃទី១២ ខែមេសា ឆ្នាំ២០២៥ និងការរៀបចំ “ទិវាជាតិកម្ពុជា” នៅថ្ងៃទី៥ ខែកក្កដា ឆ្នាំ២០២៥ ខាងមុខនេះ។

តបតាមការអញ្ជើញរបស់លោក SHIONYA Tsuyoshi នាយកគ្រប់គ្រងមជ្ឈមណ្ឌលសហប្រតិបត្តិការអន្តរជាតិជប៉ុន (JICE) នៅទីក្រុងតូក្យូ នៅព្រឹកថ្ងៃទី១៨​ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន អមដោយ លោក សុខ ធា អគ្គទីប្រឹក្សា បានអញ្ជើញចូលរួមជាភ្ញៀវកិត្តិយស ក្នុងកម្មវិធីរាយការណ៍អំពីលទ្ធផលនៃទស្សនកិច្ចសិក្សានៅប្រទេសជប៉ុន ពីថ្ងៃទី ១២ ដល់ ១៩ ខែមិនា ឆ្នាំ ២០២៥ របស់អ្នកនយោបាយវ័យក្មេងដែលជាតំណាងគណបក្សនយោបាយ និងសង្គមស៊ីវិលកម្ពុជាចំនួន ១០រូប មកពីគណបក្សនយោបាយចំនួន៨ រួមមាន គណបក្សប្រជាជនកម្ពុជា (ពីររូប) និងមួយរូបៗ មកពី គណបក្សរួបរួមជាតិខ្មែរ គណបក្សយុវជនកម្ពុជា គណបក្សហ្វ៊ុនស៊ិនប៉ិច គណបក្សភ្លើងទៀន/ គណបក្សឆន្ទៈខ្មែរ គណបក្សកែទម្រង់កម្ពុជា គណបក្សប្រជាធិបតេយ្យមូលដ្ឋាន និងគណបក្សកម្លាំងជាតិ ព្រមទាំងតំណាងសង្គមស៊ីវិលពីវិទ្យាស្ថានប្រជាធិបតេយ្យកម្ពុជាចំនួន ១រូប។ 

កម្មវិធីនេះ មានគោលបំណងលើកកម្ពស់ការយល់ដឹងអំពីលទ្ធិប្រជាធិបតេយ្យនៅជប៉ុន និងការស្វែងយល់ពីគ្នាទៅវិញទៅមកក្នុងចំណោមអ្នកនយោបាយវ័យក្មេង និងតំណាងសង្គមស៊ីវិលកម្ពុជា។ លោក TAKIMI Kazuyuki អ្នកសម្របសម្រួលជាន់ខ្ពស់ផ្នែកតំបន់ ជាតំណាងក្រសួងការបរទេសជប៉ុន ក៏បានអញ្ជើញចូលរួមជាភ្ញៀវកិត្តិយសក្នុងកម្មវិធីនេះផងដែរ។

កម្មវិធីសំខាន់ៗនៃទស្សនកិច្ចសិក្សា រួមមាន ការជួបសំដែងការគួរសម លោកជំទាវ Akiko Ikuina អនុរដ្ឋមន្ត្រីក្រសួងការបរទេសជប៉ុន, ការចូលទស្សនាសម័យប្រជុំពេញអង្គសភាជាន់ទាបជប៉ុន និងការផ្លាស់ប្តូរយោបល់ជាមួយសមាជិកសភានៃសម្ព័ន្ធសភាមិត្តភាពជប៉ុន-កម្ពុជា ព្រមទាំងការចូលរួមសង្កេតការណ៍បោះឆ្នោតជ្រើសរើសអភិបាលខេត្ត Chiba ផងដែរ។

ក្នុងឱកាសថ្លែងបូកសរុបលទ្ធផលទស្សនកិច្ចសិក្សានោះ ឯកឧត្តម ឯកអគ្គរាជទូត បានអបអរសាទរចំពោះទស្សនកិច្ចដ៏សំខាន់ប្រកបដោយផ្លែផ្ការបស់អ្នកនយោបាយវ័យក្មេង និងតំណាងសង្គមស៊ីវិលកម្ពុជា ដែលបានក្រេបជញ្ជក់យកចំណេះដឹងថ្មីៗ និងដកស្រង់បទពិសោធន៍ជាក់ស្តែងនិងមានតម្លៃ រួមមាន ប្រព័ន្ធនយោបាយក្នុងប្រទេសជប៉ុន ដំណើរការបោះឆ្នោតនិងលទ្ធិប្រជាធិបតេយ្យ អភិបាលកិច្ចល្អ ការរីកចម្រើនគ្រប់វិស័យក្នុងប្រទេសជប៉ុន ជាដើម។ ឯកឧត្តមក៏បានបង្ហាញចំណាប់អារម្មណ៍រីករាយជាខ្លាំង ដោយទទួលបានព័ត៌មានថា អ្នកនយោបាយវ័យក្មេង និងតំណាងសង្គមស៊ីវិលកម្ពុជាបានសហការគ្នាយ៉ាងល្អ និងមានសាមគ្គីភាពក្នុងពេលបំពេញទស្សនកិច្ចសិក្សានេះ និងបានស្នើពួកគាត់បន្តកិច្ចសន្ទនា និងទំនាក់ទំនង ពេលអញ្ជើញត្រឡប់ទៅកម្ពុជាវិញ។ ជាងនេះទៀត ឯកឧត្តម ក៏បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនជប៉ុន ចំពោះការចូលរួមចំណែកដ៏សំខាន់ ដល់ដំណើរការសន្តិភាពរបស់កម្ពុជាក្នុងទសវត្សរ៍ទី៩០ និងការបន្តជួយគាំទ្រ ដល់ការស្តារ និងអភិវឌ្ឍន៍សេដ្ឋកិច្ចសង្គមរបស់កម្ពុជា រហូតដល់ពេលបច្ចុប្បន្ន៕

នៅរសៀលថ្ងៃទី១៨ ខែមីនា ឆ្នាំ២០២៥ តបតាមសំណើរបស់និស្សិត ឯកឧត្តម ទុយ រី ឯកអគ្គរាជទូតកម្ពុជាប្រចាំជប៉ុន អមដោយមន្ត្រីស្ថានទូត បានអនុញ្ញាតជូន និស្សិតយោធាកម្ពុជាចំនួន ៣រូប ដែលបានបញ្ចប់ការសិក្សាថ្នាក់បរិញ្ញាប័ត្ររយៈពេល ៤ឆ្នាំ ដោយជោគជ័យពីសាលាបណ្ឌិតសភាយោធាជប៉ុន ចូលជួបសំដែងការគួរសម និងជម្រាបលា ក្នុងឱកាសដែលពួកគាត់នឹងត្រូវត្រឡប់ទៅប្រទេសកម្ពុជាក្នុងពេលឆាប់ៗខាងមុខ។

ឯកឧត្តមឯកអគ្គរាជទូត បានសំដែងការអបអរសាទរក្នុងឱកាសបញ្ចប់ការសិក្សានេះ និងមានប្រសាសន៍ណែនាំនិងចែករំលែកនូវបទពិសោធន៍ការងារមួយចំនួនរបស់ ឯកឧត្តម ដល់និស្សិតយោធាទាំង ៣រូប ក្នុងគោលដៅលើកទឹកចិត្តដល់ពួកគាត់ឱ្យចែករំលែក និងប្រើប្រាស់ចំណេះដឹង និងជំនាញដែលបានសិក្សានៅប្រទេសជប៉ុនដ៏មានសារសំខាន់នេះ ទៅចូលរួមជួយអភិវឌ្ឍប្រទេសកម្ពុជា ក៏ដូចជាបន្តពង្រឹងសមត្ថភាព និងចំណេះដឹងដែលមានស្រាប់បន្ថែមទៀត។ 

ជាងនេះទៀត ឯកឧត្តម ក៏បានកោតសសើរ និងអរគុណចំពោះការចូលរួមយ៉ាងសកម្មរបស់ក្រុមនិស្សិតយោធាក្នុងការងារសង្គម ជាមួយស្ថានទូតកន្លងមក។ ជាការឆ្លើយតប និស្សិតយោធាកម្ពុជាបានគោរពថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមឯកអគ្គរាជទូត និងមន្ត្រីស្ថានទូតទាំងអស់ ដែលបានជួយសម្របសម្រួល គាំទ្រ និងយកចិត្តទុកដាក់យ៉ាងខ្លាំង ក្នុងអំឡុងពេលសិក្សារបស់ពួកគាត់នៅប្រទេសជប៉ុន៕