នៅព្រឹកថ្ងៃទី១២ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម បានអនុញ្ញាតជូនលោកស្រី អាយ៉ាកាក់ (Ayaka Matsuno) នាយកកម្មវិធីនវានុវត្តន៍សង្គម នៃមូលនិធិ SASAKAWA PEACE FOUNDATION ប្រទេសជប៉ុន រួមជាមួយសហការី ចូលជួបសម្ដែងការគួរសម និងជម្រាបជូនអំពីមូលនិធិ SASAKAWA PEACE FOUNDATION (SPF) និងគម្រោងរបស់មូលនិធិមួយចំនួននៅប្រទេសកម្ពុជាកន្លងមក ដូចជាកម្មវិធី Cnai Accelerator Program និងកម្មវិធី Inclusive Mentoring Network for Entrepreneur (IMNEt) នៅខេត្តសៀមរាប និងបាត់ដំបង ព្រមទាំងគម្រោងនាពេលបច្ចុប្បន្ន និងកិច្ចសហប្រតិបត្តិការនានាក្នុងពេលខាងមុខរវាងកម្ពុជា-ជប៉ុន ពាក់ព័ន្ធនឹងការលើកកម្ពស់ស្រ្តី (Gender Equality) លើការអភិវឌ្ឍន៍វិស័យឯកជនកម្ពុជា ជាពិសេសសហគ្រិនខ្មែរ និងសហគ្រាសធុនតូច-មធ្យម (SMEs) ដែលជាគោលដៅរួមដ៏សំខាន់មួយរបស់មូលនិធិក្នុងការពង្រឹងទំនាក់ទំនងយុទ្ធសាស្រ្ត រវាងប្រទេសតំបន់អាស៊ី និងប្រទេសជប៉ុន។

ក្នុងឱកាសនោះ ឯកឧត្តមឯកអគ្គរាជទូត បានថ្លែងអំណរគុណដល់មូលនិធិ SASAKAWA PEACE FOUNDATION ដែលបានចូលរួមនិងកំពុងបន្តអភិវឌ្ឍន៍សេដ្ឋកិច្ច-សង្គមកម្ពុជា តាមរយៈការលើកកម្ពស់វិស័យសហគ្រិនខ្មែរ និង SMEs ព្រមទាំងគាំទ្រយ៉ាងពេញទំហឹងចំពោះគម្រោង និងកិច្ចសហប្រតិបត្តិការនានា រវាងមូលនិធិ SPF និងកម្ពុជា។ ឯកឧត្តមឯកអគ្គរាជទូត បានគូសបញ្ជាក់ថា ស្ថានទូត បានត្រៀមខ្លួនជាស្រេចក្នុងការសម្របសម្រួលរវាងមូលនិធិ SPF ជាមួយភាគីកម្ពុជាពាក់ព័ន្ធ ដើម្បីឱ្យគម្រោងទាំងនេះដំណើរការទៅមុខទៀតដោយរលូន ក្នុងទិសដៅរួមចំណែកជំរុញកំណើនវិនិយោគ និងសកម្មភាពពាណិជ្ជកម្ម រវាងកម្ពុជា-ជប៉ុន៕