នាព្រឹកថ្ងៃទី១៨ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម បានជួបពិភាក្សាការងារជាមួយគណៈប្រតិភូក្រសួងពាណិជ្ជកម្ម ដឹកនាំដោយ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម ដោយផ្តោតសំខាន់លើវឌ្ឍនភាពនៃការងាររៀបចំ និងការចូលរួមរបស់កម្ពុជា ក្នុងពិព័រណ៍ពិភពលោក ២០២៥ អូសាកា កាន់សៃ ដែលនឹងប្រព្រឹត្តទៅរយៈពេល ៦ខែ ចាប់ពីថ្ងៃទី១៣ ខែមេសា ដល់ថ្ងៃទី១៣ ខែតុលា ឆ្នាំ ២០២៥។ 

តាមរយៈជំនួបនេះ ភាគីទាំងពីរ នឹងបន្តសហការគ្នា ក្នុងការសម្របសម្រួលជាមួយភាគីជប៉ុនពាក់ព័ន្ធ ព្រមទាំងសហគមន៍ខ្មែរ ពលករ-កម្មសិក្សាការីខ្មែរ និងសិស្សនិស្សិតខ្មែរ ដើម្បីធានាឱ្យដំណើរការរៀបចំពន្លាជាតិកម្ពុជា ប្រព្រឹត្តិទៅបានដោយរលូន និងទាន់ពេលវេលាកំណត់ ជាពិសេសទទួលបានជោគជ័យក្នុងការរៀបចំពិធីការ និងការងារភស្តុភារ ជូនថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា ដែលនឹងអញ្ជើញដឹកនាំគណៈប្រតិភូកម្ពុជា មកចូលរួមក្នុង "ពិធីបើកពិព័រណ៍ពិភពលោក ២០២៥ អូសាកា" នៅថ្ងៃទី១២ ខែមេសា ឆ្នាំ២០២៥ និងការរៀបចំ “ទិវាជាតិកម្ពុជា” នៅថ្ងៃទី៥ ខែកក្កដា ឆ្នាំ២០២៥ ខាងមុខនេះ។