នាឱកាសនោះ ឯកឧត្តមឯកអគ្គរាជទូត បានអបអរសាទរចំពោះក្រុមការងារថ្មីទាំងអស់ រួមទាំង លោក ប៉ែន និធិ ដែលត្រូវបានផ្តល់សេចក្តីទុកចិត្ត និងបានជាប់ឆ្នោតជ្រើសរើសជាប្រធានថ្មីនៃ CSAJ ។ បន្ទាប់ពីបានស្តាប់នូវសេចក្តីរាយការណ៍របស់ប្រធានសមាគមនិស្សិតអំពី សកម្មភាពសមាគម រចនាសម្ព័ន្ធរបស់ CSAJ រួមទាំងរបស់សមាគមនិស្សិតខ្មែរនៃតំបន់ទាំង៥ នៅប្រទេសជប៉ុន និងគម្រោងផែនការសកម្មភាពក្នុងឆ្នាំ២០២៥រួចមក ឯកឧត្តមឯកអគ្គរាជទូត បានកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងនិងកិច្ចសហការ របស់សមាគមកន្លងមក ក្នុងការចែករំលែកនូវចំណេះដឹងនិងបទពិសោធន៍នានាក្នុងចំណោមនិស្សិតខ្មែរ សាមគ្គីភាពនិងការចេះជួយគ្នាទៅវិញទៅមក សកម្មភាពផ្សព្វផ្សាយនិងលើកកម្ពស់វប្បធម៌ខ្មែរ ក៏ដូចជា សកម្មភាពសប្បុរសធម៌នានា ជាពិសេស ការចូលរួមយ៉ាងសកម្មក្នុងការងារសង្គមជាមួយស្ថានទូតនាពេលកន្លងមក។

ឯកឧត្តមឯកអគ្គរាជទូតក៏បានសង្កត់ធ្ងន់អំពីសារសំខាន់នៃការកសាងធនធានមនុស្ស ដែលជាអាទិភាពទី១ ក្នុងចំណោមអាទិភាពទាំង៥ នៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងបានលើកទឹកចិត្តដល់និស្សិតទាំងអស់បន្តខិតខំព្យាយាមរៀនសូត្រ និងយកចំណេះដឹង ជំនាញ និងបទពិសោធន៍ទាំងនោះ មករួមចំណែកដល់ការអភិវឌ្ឍសេដ្ឋកិច្ច និងសង្គមជាតិ។

ឆ្លៀតក្នុងឱកាសនោះ ឯកឧត្តមឯកអគ្គរាជទូត បានគាំទ្រ និងចូលរួមចំណែក លើគំនិតផ្តួចផ្តើមរៀបចំល្ខោនយីកេ ដើម្បីលើកស្ទួយនិងផ្សព្វផ្សាយអំពីវប្បធម៌ជាតិ តបតាមសំណើរបស់ CSAJ។

ជាចុងក្រោយ ឯកឧត្តមឯកអគ្គរាជទូត បានជូនពរក្មួយៗដែលជាប្រធាន អនុប្រធាន និងសមាជិកទាំងអស់របស់សមាគមនិស្សិត ឱ្យមានសុខភាពល្អ និងជោគជ័យគ្រប់ភារកិច្ចការងារ និងនៅក្នុងការសិក្សា៕