នៅរសៀលថ្ងៃទី១២ ខែមីនា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម បានអញ្ជើញចូលរួមថ្លែងសុន្ទរកថាបើកកម្មវិធីសិក្ខាសាលា “PIANC Cambodia Seminar 2025” ដែលរៀបចំឡើងដោយ អង្គការអន្តរជាតិ PIANC-Japan និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន នៅសណ្ឋាគារ LEPORT KOJIMACHI ទីក្រុងតូក្យូ ដោយមានការចូលរួមពី វាគ្មិនកម្ពុជានិងជប៉ុន ព្រមទាំងតំណាងក្រសួង-ស្ថាប័នជប៉ុនពាក់ព័ន្ធ និងក្រុមហ៊ុនឯកជនជប៉ុន ប្រមាណជាង ៦០នាក់។

សិក្ខាសាលានេះ មានការគាំទ្រដោយក្រសួងកសិកម្ម រុក្ខាប្រមាញ់ និងនេសាទជប៉ុន និងអង្គការ JICA ផងដែរ ហើយត្រូវបានរៀបចំឡើងក្នុងគោលបំណងចែករំលែកព័ត៌មាន និងផ្លាស់ប្តូរបទពិសោធន៍គ្នាអំពីដំណើរប្រតិបត្តិការនៃកំពង់ផែ និងសេវាកម្មឡូជីស្ទីក ព្រមទាំងការអភិវឌ្ឍន៍វិស័យសាធារណការ និងដឹកជញ្ជូន របស់ប្រទេសកម្ពុជា និងជប៉ុន។

ក្នុងឱកាសនោះ វាគ្មិនកម្ពុជា ចំនួន ២រូប មកពីក្រសួងសាធារណការ និងដឹកជញ្ជូន បានធ្វើបទបង្ហាញអំពី “Current Status and Challenges of Shipping and Logistics in Cambodia” និងវាគ្មិនកម្ពុជា ២រូបទៀត មកពីកំពង់ផែស្វយ័តក្រុងព្រះសីហនុ បានធ្វើបទបង្ហាញអំពី “Current Situation and Port Development Plan of Sihanoukville Autonomous Port” ក្នុងគោលបំណងដើម្បីពង្រឹងកិច្ចសហប្រតិបត្តិការលើវិស័យសាធារណការ និងដឹកជញ្ជូន រវាងកម្ពុជា-ជប៉ុន និងជំរុញវិស័យឯកជនជប៉ុន ឱ្យមកពង្រីកការវិនិយោគរបស់ខ្លួនបន្ថែមទៀតនៅកម្ពុជា លើវិស័យដឹកជញ្ជូន ហេដ្ឋារចនាសម្ព័ន្ធ និងសេវាកម្មឡូជីស្ទីកផងដែរ។