នៅរសៀលថ្ងៃទី២០ ខែកុម្ភៈ ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន បានអញ្ជើញដឹកនាំសហការី ចូលរួមជាវាគ្មិនធ្វើបទបង្ហាញនៅក្នុងកម្មវិធីសិក្ខាសាលាស្តីអំពី “ទីផ្សារការងារកម្មសិក្សាការីខ្មែរ និងសក្តានុពលវិនិយោគនៅប្រទេសកម្ពុជា” រៀបចំឡើងដោយសាលាក្រុងអាសាគូឈិ សហការជាមួយសមាគមកម្ពុជា-ជប៉ុនគិបូ (CJKA) នៅទីក្រុងអាសាគូឈិ ខេត្តអូកាយ៉ាម៉ា ដែលមានប្រធានក្រុមហ៊ុន និងតំណាងក្រុមហ៊ុនជប៉ុន ចូលរួមចំនួន ៣៣ក្រុមហ៊ុន។ សិក្ខាសាលានេះ ប្រព្រឹត្តទៅក្រោមអធិបតីភាព ឯកឧត្តម ទុយ រី ឯកអគ្គរាជទូតកម្ពុជា និង ឯកឧត្តម YASUHIKO KURIYAMA អភិបាលក្រុងអាសាគូឈិ និងរៀបចំឡើងក្នុងគោលបំណងដើម្បីផ្តល់ព័ត៌មានបច្ចុប្បន្នភាពស្តីពីការទទួលយកកម្មសិក្សាការីបច្ចេកទេស និងពលករជំនាញខ្មែរ ព្រមទាំងការអភិវឌ្ឍន៍សេដ្ឋកិច្ចពាណិជ្ជកម្ម និងសក្ដានុពលវិនិយោគនៅកម្ពុជា ក្នុងទិសដៅពង្រីកទីផ្សារការងារ និងទាក់ទាក់ទាញអ្នកវិនិយោគជប៉ុន ក៏ដូចជាជំរុញអ្នកទេសចរជប៉ុន ទៅធ្វើធុរកិច្ចវិនិយោគ និងធ្វើទេសចរនៅប្រទេសកម្ពុជា។

ថ្លែងក្នុងឱកាសនោះ ឯកឧត្តមឯកអគ្គរាជទូតកម្ពុជា បានរំលឹកអំពីទំនាក់ទំនងការទូតរវាងកម្ពុជា-ជប៉ុន ដែលរហូតមកដល់បច្ចុប្បន្ននេះ ចំណងមិត្តភាពទ្វេភាគីកម្ពុជា និងជប៉ុន ត្រូវបានដំឡើងទៅដល់កម្រិត “ភាពជាដៃគូយុទ្ធសាស្រ្តគ្រប់ជ្រុងជ្រោយ”។ ឯកឧត្តមឯកអគ្គរាជទូត ក៏បានលើកឡើងអំពីកិច្ចសហប្រតិបត្តិការជាមួយក្រសួង-ស្ថាប័នជប៉ុន អង្គការ JETRO មជ្ឈមណ្ឌលអាស៊ានជប៉ុន ព្រមទាំងសមិទ្ធផល និងសកម្មភាពនានារបស់ស្ថានទូត ដែលបានរៀបចំកន្លងមក និងបានកំពុងអនុវត្តបន្តទៀតតាមយុទ្ធសាស្រ្តការទូតសេដ្ឋកិច្ចកម្ពុជា ជាពិសេសពិព័រណ៍កម្ពុជា ការរៀបចំសិក្ខាសាលាវិនិយោគ ទិវាវប្បធម៌ ការប្រឡងនិយាយភាសាជប៉ុន ពិធីបុណ្យជាតិ និងពិធីសាសនាផ្សេងៗជាដើម។ ឯកឧត្តមឯកអគ្គរាជទូត បានគូសបញ្ជាក់ថា រាជរដ្ឋាភិបាលកម្ពុជា តែងតែយកចិត្តទុកដាក់បំផុតចំពោះវិនិយោគិនជប៉ុនដែលបានកំពុងធ្វើការវិនិយោគនៅប្រទេសកម្ពុជា ដោយក្នុង ១ឆ្នាំ ២ដង រាជរដ្ឋាភិបាលកម្ពុជា ជាពិសេសក្រុមប្រឹក្សាអភិវឌ្ឍន៍កម្ពុជា តែងតែរៀបចំវេទិកា ជួបពិភាក្សា ស្តាប់សំណូមពរ និងដោះស្រាយបញ្ហាកង្វល់ជូនធុរជន និងអ្នកវិនិយោគជប៉ុន ដែលមានការចូលរួមដោយ ឯកអគ្គរដ្ឋទូតជប៉ុនប្រចាំកម្ពុជា ធុរជន និងអ្នកវិនិយោគជប៉ុននៅទីនោះ។ ជាមួយគ្នានោះ ឯកឧត្តមឯកអគ្គរាជទូត ក៏បានជំរុញនិងលើកទឹកចិត្តអ្នកវិនិយោគិនជប៉ុន ឱ្យពិនិត្យលទ្ធភាពទៅដាក់ទុនវិនិយោគ និងធ្វើធុរកិច្ចពាណិជ្ជកម្មនៅប្រទេសកម្ពុជា ក៏ដូចជាអញ្ជើញប្រជាជនជប៉ុនទៅទស្សនាកម្ពុជាឱ្យកាន់តែច្រើនឡើងថែមទៀត។

ក្នុងឱកាសនោះដែរ តាមរយៈការធ្វើបទបង្ហាញរបស់ លោក ស៊ីន សារ៉ាយ អនុព័ន្ធពាណិជ្ជកម្ម និងលោក កៅ និរោធន៍ អនុព័ន្ធការងារ ដែលជាវាគ្មិនក្នុងកម្មវិធីសិក្ខាសាលានេះ អ្នកវិនិយោគិន និងធុរជនជប៉ុន ដែលបានចូលរួមទាំងអស់ បានជ្រាប និងយល់កាន់តែច្បាស់អំពីស្ថានភាពល្អប្រសើរនៃសេដ្ឋកិច្ចពាណិជ្ជកម្មរបស់កម្ពុជា ការអភិវឌ្ឍន៍ធនធានមនុស្ស និងទីផ្សារការងារ នីតិវិធីទទួលយកនិងការបញ្ជូនកម្មសិក្សាការីបច្ចេកទេស និងពលករជំនាញខ្មែរទៅធ្វើការនៅបរទេស កាលានុវត្តភាពវិនិយោគ និងសក្ដានុពលវិនិយោគនៅកម្ពុជា ជាពិសេសច្បាប់ស្ដីពីវិនិយោគនៃព្រះរាជាណាចក្រកម្ពុជា ដំណើរការវិនិយោគដែលមានភាពទាក់ទាញនិងអនុគ្រោះ កិច្ចសម្រួលវិនិយោគ ការលើកទឹកចិត្តវិនិយោគ និងសេវាថែទាំវិនិយោគ ផងដែរ៕