តបតាមការអញ្ជើញរបស់សម្ព័ន្ធមិត្តភាពសភាជប៉ុន-កម្ពុជា នៅល្ងាចថ្ងៃទី២៧ ខែកុម្ភៈ ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន អមដោយមន្ត្រី និងបុគ្គលិកស្ថានទូត បានចូលរួមថ្លែងសុន្ទរកថាស្តីពី បច្ចុប្បន្នភាពនៃវឌ្ឍនភាពនយោបាយ-សេដ្ឋកិច្ចកម្ពុជា ក្នុងកិច្ចប្រជុំទូទៅរបស់សម្ព័ន្ធមិត្តភាពសភាកម្ពុជា-ជប៉ុន នៅអគារសភាជប៉ុន។ កិច្ចប្រជុំនេះ ក៏មានការចូលរួមពីសំណាក់ លោកជំទាវ OBUCHI Yuko ប្រធានថ្មីរបស់សម្ព័ន្ធមិត្តភាពសភាកម្ពុជា-ជប៉ុន, ឯកឧត្តម IMAMURA Masahiro ទីប្រឹក្សាជាន់ខ្ពស់, ឯកឧត្តម KIUCHI Minoru អគ្គលេខាធិការ និងជារដ្ឋមន្ត្រីទទួលបន្ទុក សន្តិសុខសេដ្ឋកិច្ច  ព្រមទាំងឯកឧត្តម លោកជំទាវ លោក លោកស្រី សមាជិក សមាជិកានៃសម្ព័ន្ធមិត្តភាពសភាកម្ពុជា-ជប៉ុន និងមន្ត្រីតំណាងក្រសួងការបរទេសជប៉ុន។

ក្នុងឱកាសនោះ ឯកឧត្តមឯកអគ្គរាជទូត បានចូលរួមអបអរសាទរចំពោះការតែងតាំងជាផ្លូវការរបស់ប្រធានថ្មី ទីប្រឹក្សាជាន់ខ្ពស់ និងអគ្គលេខាធិការរបស់សម្ព័ន្ធមិត្តភាពសភាកម្ពុជា-ជប៉ុន និងបានសំដែងនូវការប្តេជ្ញាចិត្តខ្ពស់ក្នុងការធ្វើការយ៉ាងជិតស្និទ្ធជាមួយគ្នា ដើម្បីពង្រឹង និងពង្រឹកទំនាក់ទំនងកាន់តែរីកចម្រើន ក៏ដូចជា ជំរុញកិច្ចសហប្រតិបត្តិការលើគ្រប់វិស័យរវាងទាំងពីរបន្ថែមទៀត។ 

ក្នុងឱកាសនោះដែរ ឯកឧត្តម ឯកអគ្គរាជទូតបានជម្រាបជូនអង្គប្រជុំអំពីចំណុចសំខាន់ៗ ដូចជា ១) ការសម្រេចបាននូវសមិទ្ធផលធំៗលើគ្រប់វិស័យរបស់រាជរដ្ឋាភិបាលកម្ពុជា ក្នុងរយៈពេល ២៥ឆ្នាំចុងក្រោយ បន្ទាប់ពីការសម្រេចបាននូវសុខសន្តិភាពពេញលេញ ឯកភាពជាតិ និងទឹកដីទាំងស្រុង តាមរយៈនយោបាយឈ្នះ-ឈ្នះរបស់សម្តេចតេជោ ហ៊ុន សែន ប្រធានព្រឹទ្ធសភា, ២) ការសម្រេចបាននូវសមិទ្ធផលលេចធ្លោជាច្រើរបស់រាជរដ្ឋាភិបាលកម្ពុជា ដែលដឹកនាំដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា តាមរយៈការអនុវត្តកម្មវិធីនយោបាយក្នុងយុទ្ធសាស្ត្របញ្ចកោណ-ដំណាក់កាលទី១ ដូចជា ការរក្សាបាននូវសុខសន្តិភាព និងស្ថិរភាពសង្គម ការលើកកម្ពស់វិស័យសេដ្ឋកិច្ច ការកសាងហេដ្ឋារចនាសម្ព័ន្ធចម្បងៗ និង៣) ភាពប្រសើរឡើងជាលំដាប់នៃទំនាក់ទំនងការទូតរវាងកម្ពុជា និងជប៉ុន តាមរយៈកិច្ចសហប្រតិបត្តិការលើគ្រប់វិស័យ និងការផ្លាស់ប្តូរទស្សនកិច្ចនិងការប្រាស្រ័យទាក់ទងគ្នាជាញឹកញាប់រវាងថ្នាក់ដឹកនាំនៃប្រទេសទាំងពីរ។ ជាងនេះទៀត ឯកឧត្តម ក៏បានសំដែងការអរគុណយ៉ាងជ្រាលជ្រៅដល់រដ្ឋាភិបាល និងប្រជាជនជប៉ុន ចំពោះការរួមចំណែក និងគាំទ្រដល់កម្ពុជា ក្នុងការជួយកសាង និងស្ដារនីតិសម្បទាកម្ពុជា តាំងពីដំណាក់កាលដំបូងនៃការកសាងសន្តិភាព រហូតមកដល់ដំណាក់កាលបច្ចុប្បន្ននៃការអភិវឌ្ឍកម្ពុជា៕