នៅថ្ងៃទី១៦ ខែមីនា ឆ្នាំ២០២៥ តបតាមការអញ្ជើញរបស់ក្រុមប្រឹក្សាលើកតម្កើងហ្វ្រង់កូហ្វូនីនៅប្រទេសជប៉ុន(Conseil pour la Promotion de la Francophonie au Japon) ឯកឧត្តម ទុយ រី ឯកអគ្គរាជទូតកម្ពុជា ប្រចាំប្រទេសជប៉ុន និងមន្ត្រីស្ថានទូត បានចូលរួមរៀបចំកម្មវិធីអបអរសាទរទិវាហ្វ្រង់កូហ្វូនី (Journée de la Francophonie) នៅវិទ្យាស្ថានភាសាបារាំងនៃទីក្រុងតូក្យូ ក្នុងគោលបំណងដើម្បីពង្រឹងមិត្តភាព និងកិច្ចសហប្រតិបត្តិការរវាងបណ្តាប្រទេសដែលប្រើប្រាស់ភាសាបារាំង ព្រមទាំងផ្សព្វផ្សាយអំពីវប្បធម៌ និងសក្កានុពលទេសចរណ៍ និងការវិនិយោគពាណិជ្ជកម្ម។ 

កម្មវិធីនេះ មានការអញ្ជើញថ្លែងសុន្ទរកថាបើកដោយ ឯកឧត្តម HORIUCHI Toshihiko ជំនួយការរដ្ឋមន្ត្រីការបរទេស និងជាអគ្គនាយកនៃនាយកដ្ឋានអាហ្វ្រិកនៃក្រសួងការបរទេសជប៉ុន ឯកឧត្តម Antoine Evrard ប្រធានក្រុមប្រឹក្សាលើកតម្កើងហ្វ្រង់កូហ្វូនីនៅប្រទេសជប៉ុន និងជាឯកអគ្គរាជទូតនៃប្រទេសប៊ែលហ្សិក និងឯកឧត្តម Philippe Setton ឯកអគ្គរដ្ឋទូតនៃសាធារណរដ្ឋបារាំង។ កម្មវិធីមានជាអាទិ៍៖ ការប្រគុំតន្ត្រី ការចាក់បញ្ចាំងទស្សនីយភាព និងសកម្មភាពនានាជាច្រើន ជាពិសេសការរៀបចំស្តង់ផលិតផលនានានៃបណ្តាប្រទេសប្រើប្រាស់ភាសាបារាំងដោយស្ថានទូតប្រចាំប្រទេសជប៉ុនសរុបចំនួន ១៩ ដែលក្នុងនោះមានស្តង់របស់ស្ថានឯកអគ្គរាជទូតកម្ពុជា ផងដែរ។  

សូមគោរពជម្រាបជូនព័ត៌មានថា ប្រទេសកម្ពុជា នឹងធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនី លើកទី ២០ នៅឆ្នាំ២០២៦ នៅកម្ពុជា ដែលនឹងមានការចូលរួមពីរដ្ឋជាសមាជិកចំនួន ៩៣ និងតំណាងអង្គការអន្តរជាតិជាច្រើនទៀត៕