List News

នៅរសៀលថ្ងៃទី៤ ខែមិថុនា ឆ្នាំ២០២៥ តបតាមការអញ្ជើញរបស់លោកស្រី Miyuki INUI ប្រធាន International Service Committee ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន បានអញ្ជើញជាអធិបតីនិងថ្លែងសុន្ទរកថាបើកនៅក្នុងកម្មវិធីសិក្ខាសាលា “International Service Seminar” នៅសាកលវិទ្យាល័យណាហ្គាណុ(Nagano) ខេត្តណាហ្គាណុ រៀបចំដោយ Rotary International District (RID) 2600 ដោយមានការចូលរួមពីសំណាក់ លោក Norihiko Shiratori អភិបាលនៃ RID 2600 នៃខេត្តណាហ្គាណុ, លោកស្រី Miyuki INUI ប្រធាន International Service Committee, លោក Junichi Kobayashi នាយកសាកលវិទ្យាល័យណាហ្គាណុ, លោក Fumio TSUZUKU អតីតអភិបាល និងបច្ចុប្បន្នជាទីប្រឹក្សានៃ International Service Committee, លោក Yit Virasy នាយកអង្គការ Future Light Organization (FLO) មកពីប្រទេសកម្ពុជា ព្រមទាំងអតីតអភិបាល RID 2600 ប្រធានក្រុមហ៊ុនជប៉ុន ពាណិជ្ជករជប៉ុន និងសិស្សនិស្សិតសាកលវិទ្យាល័យណាហ្គាណុ សរុបប្រមាណ ៣០០ នាក់។

ថ្លែងក្នុងឱកាសនោះ ឯកឧត្តមឯកអគ្គរាជទូត បានសម្តែងការគាំទ្រចំពោះការរៀបចំសិក្ខាសាលានេះឡើង ក្នុងគោលបំណងលើកកម្ពស់កិច្ចសហប្រតិបត្តិការរវាងខេត្តណាហ្គាណុនិងប្រទេសកម្ពុជា និងបង្កើនការផ្សារភ្ជាប់ទំនាក់ទំនងរវាងប្រជាជននិប្រជាជន។

ទន្ទឹមនឹងនេះ ឯកឧត្តម ក៏បានជម្រាបជូនអង្គសិក្ខាសាលាអំពី៖ ១) យុទ្ធសាស្ត្របញ្ចកោណដំណាក់កាលទី១ របស់រាជដ្ឋាភិបាលកម្ពុជា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងត្រូវបានអនុវត្ត ដើម្បីកំណើន ការងារ សមធម៌ ប្រសិទ្ធភាព និងចីរភាព ព្រមទាំងជម្រុញសន្ទុះកំណើនសេដ្ឋកិច្ច និងកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ជាប្រទេសមាន ចំណូលខ្ពស់។ ២)ការបន្តរក្សាសន្តិភាពនិងស្ថិរភាពនយោបាយ ដែលធ្វើឱ្យកម្ពុជា បានបន្តរីកចម្រើនគួរឱ្យកត់សម្គាល់លើគ្រប់វិស័យ និងមានកំណើនសេដ្ឋកិច្ចក្នុងរង្វង់ ៦% នៅឆ្នាំ២០២៤ និងត្រូវបានគេរំពឹងថានឹងបន្តកើនឡើងក្នុងអត្រា ៦.២% នៅឆ្នាំ២០២៦ ៣) ទំហំពាណិជ្ជកម្មសរុបរវាងកម្ពុជានិងជប៉ុនមានជាង ២.២ ប៊ីលានដុល្លារ នៅឆ្នាំ២០២៤ ៤) ទស្សនកិច្ចផ្លូវការរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មកកាន់ប្រទេសជប៉ុន នាពេលកន្លងទៅថ្មីៗនេះ បានឆ្លុះបញ្ចាំងអំពីទំនាក់ទំនងកាន់តែជិតស្និទ្ធរវាងប្រមុខរដ្ឋាភិបាលនៃប្រទេសទាំងពីរ និងការប្តេជ្ញាចិត្តក្នុងការពង្រឹងទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរបស់ប្រទេសទាំងពីរ។

ក្នុងឱកាសនោះផងដែរ លោកស្រី អ៊ុន ពិសី លេខាធិការទី២ ក៏ត្រូវបានអញ្ជើញចូលរួមធ្វើបទបង្ហាញ និងផ្សព្វផ្សាយដល់និស្សិតជប៉ុន ព្រមទាំងអ្នកវិនិយោគជប៉ុន អំពីសក្តានុពលនៃវិស័យទេសចរណ៍កម្ពុជា និងការអភិវឌ្ឍផ្នែកហេដ្ឋារចនាសម្ព័ន្ធសំខាន់ៗរបស់កម្ពុជា ដើម្បីបង្កើនការយល់ដឹង ព្រមទាំងចូលរួមផ្សព្វផ្សាយនិងជំរុញកំណើនភ្ញៀវទេសចរជប៉ុននិងអ្នកវិនិយោគិនជប៉ុន ទៅកាន់ប្រទេសកម្ពុជាឱ្យកាន់តែច្រើនឡើងថែមទៀត។

ឆ្លៀតក្នុងឱកាសនេះដែរ ឯកឧត្តមឯកអគ្គរាជទូត ក៏បានអញ្ជើញមិត្តជប៉ុន និងអ្នកចូលរួមទាំងអស់ ចូលរួមគាំទ្រនិងទស្សនាពន្លាជាតិកម្ពុជា នៅក្នុងព្រឹត្តការណ៍ពិព័រណ៍ពិភពលោក២០២៥ អូសាកា ជាពិសេសថ្ងៃប្រារព្ធពិធីអបអរ «ទិវាជាតិកម្ពុជា» នៅថ្ងៃទី៥ ខែកក្កដា ឆ្នាំ២០២៥ ដែលនឹងមានរៀបចំកម្មវិធីសម្ដែងសិល្បៈ វប្បធម៌ខ្មែរ ការដើរព្យុហយាត្រាវប្បធម៌ ការតាំងបង្ហាញផលិតផលខ្មែរនិងម្ហូបអាហារខ្មែរ វេទិកាវិនិយោគ និងសកម្មភាពជំរុញពាណិជ្ជកម្មមួយចំនួនទៀត។

ជាចុងក្រោយ ឯកឧត្តមឯកអគ្គរាជទូត បានលើកទឹកចិត្ត និងជំរុញពាណិជ្ជករនិងអ្នកវិនិយោគជប៉ុនទាំងអស់ ឱ្យមកបណ្តាក់ទុនកាន់តែច្រើនឡើងនៅកម្ពុជា ដើម្បីឆ្លុះបញ្ចាំងពីភាពជាដៃគូយុទ្ធសាស្ត្រគ្រប់ជ្រុងជ្រោយរបស់ប្រទេសទាំងពីរ៕

នាថ្ងៃទី២១ ខែមេសា ឆ្នាំ២០២៥ ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន អមដោយលោក ស៊ីន សារ៉ាយ អនុព័ន្ធពាណិជ្ជកម្ម បានអញ្ជើញចូលរួមជាអធិបតី នៅក្នុងកម្មវិធីធ្វើបទបង្ហាញ Mission on the Ground (MoG) របស់សិស្សវិទ្យាល័យជប៉ុន ចំនួន ១០០នាក់ ដែលទើបត្រលប់ពីការធ្វើទស្សនកិច្ចសិក្សានៅខេត្តសៀមរាប នៃព្រះរាជាណាចក្រកម្ពុជា។ កម្មវិធីនេះ រៀបចំឡើងដោយក្រុមហ៊ុន Tobu Top Tours Co., Ltd. និងបានប្រព្រឹត្តទៅនៅពន្លាជាតិឯកជន Denryokukan និងពន្លាជាតិកម្ពុជា នៅក្នុងពិព័រណ៍ពិភពលោក២០២៥ អូសាកា ដោយមានការចូលរួមពីតំណាងកុងស៊ុលកិត្តិយសនៃព្រះរាជាណាចក្រកម្ពុជាប្រចាំទីក្រុងអូសាកា តំណាងក្រុមហ៊ុន Tobu Top Tours ចាងហ្វាងវិទ្យាល័យ Ritsumeikan Moriyama នៃខេត្ត Shiga ចាហ្វាងវិទ្យាល័យ Ritsumeikan Uji នៃខេត្តក្យូតុ តំណាងក្រុមហ៊ុន Very50 តំណាងពន្លាជាតិឯកជន Denryokukan តំណាងពន្លាជាតិកម្ពុជា ព្រមទាំងសិស្សានុសិស្ស នៃវិទ្យាល័យទាំងពីរ សរុបប្រមាណជាង ១០០នាក់។

ការបង្កើតកម្មវិធីនេះឡើង គឺដើម្បីផ្តល់ឱកាសដល់សិស្សនៃវិទ្យាល័យ Ritsumeikan Moriyama ចំនួន ៣៥នាក់ និងសិស្សនៃវិទ្យាល័យ Ritsumeikan Uji ចំនួន ៦៥នាក់ ដែលទើបត្រលប់ពីការធ្វើទស្សនកិច្ចសិក្សានៅខេត្តសៀមរាប បានធ្វើបទបង្ហាញពីលទ្ធផល និងសមិទ្ធផលនៃការចុះទស្សនកិច្ចសិក្សា, ចែករំលែកអំពីបទពិសោធន៍និងអនុស្សាវរីយ៍ល្អៗក្នុងអំឡុងពេលស្នាក់នៅ និងធ្វើការរយៈពេលខ្លីនៅប្រទេសកម្ពុជា, ព្រមទាំងទស្សនាពន្លាជាតិកម្ពុជាជាក់ស្ដែង ដើម្បីស្វែងយល់បន្ថែមអំពីវឌ្ឍនភាពបច្ចុប្បន្ននៃសេដ្ឋកិច្ចកម្ពុជា សក្តានុពលពាណិជ្ជកម្ម វិនិយោគ វប្បធម៌ និងវិស័យទេសចរណ៍របស់ប្រទេសកម្ពុជា ជាដើម។ ស្របទៅតាមកម្មវិធីនេះ សិស្សទាំងពីរវិទ្យាល័យ ត្រូវបានបែងចែកជា ៦ក្រុម ដោយបានធ្វើបទបង្ហាញសង្ខេបអំពីលទ្ធផល បញ្ហាប្រឈម និងដំណោះស្រាយផ្សេងៗ បន្ទាប់ពីបានធ្វើទស្សនកិច្ចសិក្សា និងធ្វើការរយៈពេលខ្លីជាមួយម្ចាស់សហគ្រិនកម្ពុជា នៅក្រុមហ៊ុន មរតក សេរ៉ាម៉ិច ក្រុមហ៊ុន CAM-AHA ក្រុមហ៊ុន Blush Boutique ក្រុមហ៊ុន Lavender Jeep និងក្រុមហ៊ុន Seung Khmer។

ក្នុងឱកាសនោះ ឯកឧត្តមឯកអគ្គរាជទូត បានសម្ដែងការអបអរសាទរដល់សិស្សទាំងពីរវិទ្យាល័យ ដែលបានបញ្ចប់ទស្សនកិច្ចសិក្សានៅប្រទេសកម្ពុជា ប្រកបដោយជោគជ័យជាផ្លែផ្លា និងបានថ្លែងអំណរគុណដល់រដ្ឋាភិបាលជប៉ុន និងប្រជាជនជប៉ុន ដែលបានចូលរួមយ៉ាងសកម្មក្នុងដំណើរការសន្តិភាពនៅកម្ពុជាកន្លងទៅ ព្រមទាំងបន្តផ្តល់នូវជំនួយឥតឈប់ឈរ ដើម្បីគាំទ្រដល់ការអភិវឌ្ឍន៍សេដ្ឋកិច្ច-សង្គមប្រទេសកម្ពុជា ជាពិសេសលើវិស័យអប់រំ សុខាភិបាល ពាណិជ្ជកម្ម វប្បធម៌ ទេសចរណ៍ និងដំណើរការដោះមីននៅកម្ពុជា ជាដើម។ ឆ្លៀតក្នុងឱកាសនោះដែរ ឯកឧត្តមឯកអគ្គរាជទូត ក៏បានជំរុញឱ្យសិស្សទាំងអស់ មកចូលរួមគាំទ្រ និងទស្សនាពន្លាជាតិកម្ពុជាម្តងទៀត នៅថ្ងៃប្រារព្ធពិធីអបអរសាទរ “ទិវាជាតិកម្ពុជា” ដែលនឹងប្រព្រឹត្តទៅនៅថ្ងៃទី ៥ ខែកក្កដា ឆ្នាំ២០២៥ ព្រមទាំងបំផុសលើកទឹកចិត្តដល់សិស្សដទៃទៀតដែលមិនធ្លាប់ទៅប្រទេសកម្ពុជា ឱ្យទៅទស្សនាប្រទេសកម្ពុជា ផងដែរ៕

NEWS